প্ৰতিদিনে কিমান নিমখ খাব ?— স্বাস্থ্য আৰু কিডনীৰ সুৰক্ষাৰ বাবে জানক সঠিক পৰিমাণ

নিমখ আমাৰ দৈনন্দিন খাদ্যৰ এক অপৰিহাৰ্য উপাদান। খাদ্যৰ সোৱাদ বৃদ্ধি কৰাৰ লগতে শৰীৰৰ বিভিন্ন স্বাভাৱিক কাৰ্যকলাপৰ বাবেও ছ’ডিয়ামৰ প্ৰয়োজন হয়। কিন্তু নিমখৰ পৰিমাণ অধিক হ’লে ই স্বাস্থ্যৰ বাবে বিপদজনক হৈ পৰিব পাৰে। সেয়ে সুস্থ হৈ থাকিবলৈ নিমখ নিয়মীয়া আৰু পৰিমিত পৰিমাণত গ্ৰহণ কৰাটো অত্যন্ত জৰুৰী।

বিশ্ব স্বাস্থ্য সংস্থাৰ পৰামৰ্শ অনুসৰি, এজন সুস্থ প্ৰাপ্তবয়স্ক ব্যক্তিয়ে দৈনিক ২,০০০ মিলিগ্ৰামতকৈ অধিক ছ’ডিয়াম গ্ৰহণ নকৰাই উচিত। ই প্ৰায় ৫ গ্ৰাম নিমখ বা এক চাহ চামুচতকৈ অলপ কম। এই পৰিমাণৰ ভিতৰত ৰন্ধনত ব্যৱহাৰ কৰা নিমখৰ লগতে দিনটোত খোৱা সকলো খাদ্য আৰু পানীয়ত থকা ছ’ডিয়ামো অন্তৰ্ভুক্ত হয়।

অৰ্থাৎ কেৱল ভাত-আঞ্জাত দিয়া নিমখৰ হিচাপ কৰিলেই নহ’ব। বহুতো প্ৰক্ৰিয়াজাত আৰু পেকেটজাত খাদ্যতো যথেষ্ট পৰিমাণে ছ’ডিয়াম থাকে। চচ, কেচাপ, ছয়া চচ, মেয়োনিজ, মাখন, কাসুন্দি, পনিৰ, ইনষ্টেণ্ট নুডলছ, চানাচুৰ, চিপছ, বিস্কুট, ছচেজ, নাগেটছ আৰু অন্যান্য প্ৰক্ৰিয়াজাত খাদ্যত লুকাই থকা নিমখৰ পৰিমাণো লক্ষ্য কৰা উচিত।

কেঁচা নিমখ বা ভজা নিমখ—কোনটো বেছি উপকাৰী?

কেঁচা নিমখ, ভজা নিমখ বা খাদ্যত ৰন্ধনৰ সময়ত ব্যৱহাৰ কৰা নিমখ—যি ৰূপতেই গ্ৰহণ কৰা নহওক কিয়, ইয়াত থকা ছ’ডিয়ামৰ পৰিমাণ নিজে নিজে কমি নাযায়। সেয়ে কেৱল নিমখৰ ধৰণ সলনি কৰিলেই অতিৰিক্ত ছ’ডিয়াম গ্ৰহণৰ আশংকা দূৰ নহয়।

কিছুমান লো-ছ’ডিয়াম বা পটেচিয়ামযুক্ত নিমখত সাধাৰণ নিমখতকৈ ছ’ডিয়াম কম থাকিব পাৰে। কিন্তু সকলোৰে বাবে এনে নিমখ উপযুক্ত নহয়। বিশেষকৈ কিডনীৰ সমস্যা বা আন দীৰ্ঘস্থায়ী ৰোগ থকা ব্যক্তিয়ে চিকিৎসকৰ পৰামৰ্শ অবিহনে এনে নিমখ ব্যৱহাৰ নকৰাই ভাল।

অতিৰিক্ত নিমখে কি ক্ষতি কৰিব পাৰে?

দীৰ্ঘদিন ধৰি অতিৰিক্ত ছ’ডিয়াম গ্ৰহণ কৰিলে উচ্চ ৰক্তচাপৰ আশংকা বৃদ্ধি পাব পাৰে। ইয়াৰ ফলত হৃদৰোগ, ষ্ট্ৰ’ক আৰু কিডনীৰ ওপৰত ক্ষতিকাৰক প্ৰভাৱ পৰাৰ সম্ভাৱনা থাকে। কিডনীয়ে শৰীৰৰ অতিৰিক্ত ছ’ডিয়াম আৰু পানীৰ ভাৰসাম্য নিয়ন্ত্ৰণ কৰাত গুৰুত্বপূৰ্ণ ভূমিকা পালন কৰে। সেয়ে কিডনীৰ সুস্থতাৰ বাবে নিমখৰ পৰিমাণ নিয়ন্ত্ৰণ কৰাটো বিশেষভাৱে গুৰুত্বপূৰ্ণ।

আনহাতে, অতি কম ছ’ডিয়ামো কিছুমান পৰিস্থিতিত স্বাস্থ্যৰ বাবে ক্ষতিকাৰক হ’ব পাৰে। সেয়ে নিজে নিজে অত্যধিক নিমখ কমাই দিয়াৰ পৰিৱৰ্তে ব্যক্তিগত স্বাস্থ্যৰ অৱস্থা অনুসৰি চিকিৎসকৰ পৰামৰ্শ লোৱাটো উচিত।

নিমখ কমোৱাৰ সহজ উপায়

• ৰন্ধনত প্ৰয়োজনতকৈ অধিক নিমখ নিদিব।
• খাদ্যৰ ওপৰত অতিৰিক্ত কেঁচা নিমখ ছটিয়াই খোৱাৰ অভ্যাস পৰিহাৰ কৰক।
• পেকেটজাত খাদ্য ক্ৰয় কৰাৰ সময়ত Sodium Content লক্ষ্য কৰক।
• ইনষ্টেণ্ট নুডলছ, চিপছ, চানাচুৰ আৰু অধিক লৱণযুক্ত স্নেকছ কমকৈ গ্ৰহণ কৰক।
• চচ, কেচাপ আৰু ছয়া চচৰ ব্যৱহাৰ সীমিত কৰক।
• সতেজ আৰু ঘৰতে প্ৰস্তুত কৰা খাদ্যক অগ্ৰাধিকাৰ দিয়ক।
• কিডনী বা অন্য দীৰ্ঘস্থায়ী ৰোগ থাকিলে ব্যক্তিগত খাদ্য-নিয়মৰ বাবে চিকিৎসক বা ডায়েটিচিয়ানৰ পৰামৰ্শ লওক।

মনত ৰাখিব: স্বাস্থ্যকৰ খাদ্য মানে কেৱল কম তেল বা কম মছলা নহয়; খাদ্যত থকা ছ’ডিয়ামৰ পৰিমাণৰ প্ৰতিও সমান গুৰুত্ব দিয়া উচিত। পৰিমিত নিমখ, সুষম খাদ্য আৰু সুস্থ জীৱনশৈলীয়ে কিডনী, হৃদযন্ত্ৰ আৰু সামগ্ৰিক স্বাস্থ্য সুৰক্ষিত ৰখাত সহায় কৰিব পাৰে।

কিডনী আৰু ইউৰ’লজিকেল সমস্যাৰ আধুনিক চিকিৎসা

গুৱাহাটীৰ সোণাপুৰৰ Kidney Hospital, Institute of Urology and Kidney Diseases (iUKD)-ত কিডনী ষ্ট’ন, কিডনী বিকলতা, প্ৰষ্টেটৰ সমস্যা, পুৰুষ-মহিলাৰ প্ৰস্ৰাৱজনিত সমস্যা, ইউৰ’লজিকেল কেঞ্চাৰ আৰু বিভিন্ন ইউৰ’লজিকেল সমস্যাৰ চিকিৎসা উপলব্ধ। জটিল কিডনী আৰু ইউৰ’লজিকেল অস্ত্ৰোপচাৰৰ ক্ষেত্ৰত অত্যাধুনিক লেজাৰ, লেপাৰ’স্কপিক আৰু ৰব’টিক ছাৰ্জাৰীও উপলব্ধ।

যোগাযোগ: 8011501833 | 9864104444
ঠিকনা: Kidney Hospital, Institute of Urology and Kidney Diseases (iUKD), Nazirakhat, Sonapur, Guwahati, Assam – 782402.